Sunday, 9 December 2012

രാധേയനായ കര്‍ണ്ണന്‍.

മഹാഭാരതത്തിലെ യഥാര്‍ത്ഥ നായകന്‍ കര്‍ണ്ണന്‍ ആണ്. പാണ്ഡവ ശകുനിയായ ശ്രീകൃഷ്ണന്‍റെ കള്ളത്തരവും ചതിയും ഇല്ലായിരുന്നെങ്കില്‍, കര്‍ണ്ണന്‍ നിഷ്പ്രയാസം അര്‍ജുനനെയും കൂട്ടരെയും തോല്പിക്കുമായിരുന്നു. അദ്ദേഹം തികഞ്ഞ യോദ്ധാവും ദയാശീലനും ആയിരുന്നു. വിശ്വൈകധനുര്‍ദ്ധരനായ ആ മഹാനുഭാവന്‍ പകച്ചു നിന്നത് പാണ്ഡവരുടെ അവഹേളനത്തിനു മുന്‍പില്‍ മാത്രം. രാജാവിനോടല്ലാതെ അര്‍ജ്ജുനന്‍ യുദ്ധം ചെയ്യില്ലെന്ന് വന്നപ്പോള്‍, കര്‍ണ്ണനെ അംഗരാജാവായി വാഴിച്ച ദുര്യോധനന്‍റെ സൌഹൃദത്തിനു മുന്നിലും കര്‍ണ്ണന്‍ അശക്തനായി. അര്‍ജുനനേക്കാള്‍ കഴിവും ശരവേഗവുമുള്ള കര്‍ണ്ണനെ ജാതി പറഞ്ഞും പുലഭ്യം പറഞ്ഞും അപഹാസ്യനാക്കുന്നതില്‍ പാണ്ഡവര്‍ മിടുക്ക് കാട്ടി. പാഞ്ചാല രാജധാനിയിലെ സ്വയംവര വേദിയില്‍ വച്ച് ദ്രൌപതിയും കര്‍ണ്ണനെ നികൃഷ്ട ജീവി എന്നോണം നാണം കെടുത്തി. കുരുക്ഷേത്ര യുദ്ധത്തില്‍ അവസരങ്ങള്‍ ഒരുപാട് വന്നു ചേര്‍ന്നിട്ടും യുധിഷ്ഠിരനെയും, ഭീമനെയും, നകുല സഹദേവന്‍മാരെയും സുവര്‍ണ്ണശോഭയുള്ള ആ സിംഹകായന്‍ വധിച്ചില്ല. ഫലത്തില്‍ കര്‍ണ്ണന്‍റെ പിച്ചയാണ് അവരുടെ ശിഷ്ട ജീവിതം. ദാനാര്‍ത്ഥിയായ വിപ്രന് വേണ്ടി ജീവന്‍ ഉള്‍പ്പെടെ എന്തും ദാനം ചെയ്യുന്ന ആ മഹാപ്രതിഭയെ അര്‍ജുനനു വധിക്കാന്‍ സാധിക്കില്ലെന്ന് മനസിലാക്കിയ ഇന്ദ്രന്‍ തന്ത്രപൂര്‍വ്വം കരുക്കള്‍ നീക്കി. കര്‍ണ്ണനെ അവധ്യനാക്കുന്ന കവച കുണ്ഡലങ്ങള്‍ ഇരന്നു വാങ്ങിയാണ് അര്‍ജുനന്‍റെ ജീവന്‍ കുരുക്ഷേത്ര ഭൂവില്‍ രക്ഷിക്കപ്പെട്ടത്‌.. ആയതിനാല്‍ അതിന്‍റെ എല്ലാ ദുഷ്കീര്‍ത്തിയും അര്‍ജുനനുള്ളതാണ്. ഉഗ്രമായൊരു കര്‍ണ്ണ വിശിഖമേറ്റ് തേര്‍ത്തട്ടില്‍ മോഹാലാസ്യപ്പെട്ടു വീണ അര്‍ജുനനെ യുദ്ധധര്‍മ്മങ്ങള്‍ മറികടന്നു അനായാസേന കര്‍ണ്ണനു വധിക്കാമായിരുന്നു. പക്ഷെ ആ സമയം യുദ്ധഭൂവില്‍ പുതഞ്ഞു പോയ തേര്‍ ചക്രം ഉയര്‍ത്താനാണ് അദ്ദേഹം വിനിയോഗിച്ചത്. ആലസ്യത്തില്‍ നിന്നുണര്‍ന്ന അര്‍ജുനന്‍, കയ്യില്‍ ധനുസ്സേന്തിയ കര്‍ണ്ണനെ വധിക്കുന്നത് അപ്രാപ്യം എന്ന യാഥാര്‍ത്ഥ്യം മനസിലാക്കി. തുടര്‍ന്ന് കൃഷ്ണന്‍റെ ഉപദേശാര്‍ത്ഥം രഥചക്രം ഉയര്‍ത്താന്‍ ശ്രമിക്കുന്ന കര്‍ണ്ണനെ യുദ്ധധര്‍മ്മങ്ങള്‍ കാറ്റില്‍പ്പറത്തിയാണ് അര്‍ജുനന്‍ വധിച്ചത്.

No comments:

Post a Comment